കടന്നുവരൂ; ഡോക്ടര്‍ പോലീസ് സ്റ്റേഷനിലുണ്ട്




കണ്ണൂര്‍ : കണ്ണൂര്‍ നഗരത്തില്‍ ഞായറാഴ്ച ഡോക്ടറുടെ സേവനം കിട്ടിയില്ലെങ്കില്‍ നേരെ ടൗണ്‍ പോലീസ് സ്റ്റേഷനിലേക്കു പോരുക. പരാതി പറയാനല്ല, ചികിത്സയ്ക്കു തന്നെ, അതും സൗജന്യമായി. ഡോക്ടര്‍ റെഡിയാണ്.! ശിശുസൗഹൃദ പോലീസ് സ്റ്റേഷനായ കണ്ണൂര്‍ ടൗണ്‍ പോലീസ് സ്റ്റേഷനിലാണ് എല്ലാ ഞായറാഴ്ചയും ശിശുരോഗവിദഗ്ധരുടെ സേവനം ഒരുക്കിയിരിക്കുന്നത്.
ഞായറാഴ്ചകളില്‍ ശിശുരോഗവിദഗ്ധരുടെ സേവനം നഗരത്തില്‍ ലഭ്യമാകുന്നില്ല എന്ന പരാതിയെത്തുടര്‍ന്നാണ് കണ്ണൂര്‍ ടൗണ്‍ സ്റ്റേഷന്‍ ഓഫീസര്‍ ടി.കെ. രത്നകുമാറിന്റെ നേതൃത്വത്തില്‍ സൗജന്യ ഒഴിവുദിന ചികിത്സാപദ്ധതി ആവിഷ്കരിച്ചത്. ഇന്ത്യന്‍ അക്കാഡമി ഓഫ് പീഡിയാട്രിക്സ് കണ്ണൂര്‍ യൂണിറ്റിന്റെ സഹായത്തോടെയാണു ചികിത്സാപദ്ധതി നടപ്പാക്കുന്നത്.
ഡോ: എം.കെ. നന്ദകുമാര്‍, ഡോ: അജിത്ത് സുഭാഷ്, ഡോ: അന്‍സാരി, ഡോ: രവീന്ദ്രന്‍, ഡോ: രാജീവന്‍, ഡോ: പ്രശാന്ത്, ഡോ: അജിത്ത് മേനോന്‍ തുടങ്ങിയ 14 ഡോക്ടര്‍മാരാണ് ഓരോ ആഴ്ചയിലും സേവനത്തിന് എത്തുക. രാവിലെ 10 മുതല്‍ ഉച്ചയ്ക്ക് ഒരു മണിവരെയായിരിക്കും പരിശോധനാസമയം . 14ന് മന്ത്രി രാമചന്ദ്രന്‍ കടന്നപ്പള്ളി പദ്ധതി ഉദ്ഘാടനം ചെയ്ും.യ
കണ്ണൂരിനെ വിശപ്പ് രഹിത-ഭിഷാടന വിമുക്തജില്ലായാക്കി മാറ്റുന്നതിന്റെ ഭാഗമായി കഴിഞ്ഞ ഡിസംബറില്‍ ടൗണ്‍ പോലീസ് നടപ്പാക്കിയ അക്ഷയപാത്രം പദ്ധതി ഏറെ വിജയകരമായിരുന്നു.
കൂടാതെ നാടകോത്സവം, ഫുട്ബോള്‍, ക്രിക്കറ്റ്, ഷട്ടില്‍ ടൂര്‍ണമെന്റുകള്‍ എന്നിവയും ജനപങ്കാളിത്തത്തോടെ കണ്ണൂരിലെ വിവിധ സ്റ്റേഷനുകളിലെ പോലീസുകാരുടെ നേതൃത്വത്തില്‍ നടക്കുന്നുണ്ട്. പ്രവര്‍ത്തനമികവിന് വളപട്ടണം പോലീസ് സ്റ്റേഷനു ദേശീയ അംഗീകാരം ലഭിച്ചിരുന്നു. കേരളത്തിലെ ആറു പോലീസ് സ്റ്റേഷനുകളാണ് ശിശുസൗഹൃദമായി പ്രഖ്യാപിച്ചിട്ടുള്ളത്. തിരുവനന്തപുരം ഫോര്‍ട്ട്, കൊല്ലം ഈസ്റ്റ്, എറണാകുളം കടവന്ത്ര, തൃശൂര്‍ ഈസ്റ്റ്, കോഴിക്കോട് ടൗണ്‍,കണ്ണൂര്‍ ടൗണ്‍ എന്നിവ. കുട്ടികളുമായി സംവദിക്കുന്നതിന് പ്രത്യേക മുറിയും മറ്റ് സൗകര്യങ്ങളും ഇവിടെ ഒരുക്കിയിട്ടുണ്ട്.
വിജ്ഞാനപ്രദമായ പുസ്തകങ്ങളും മാസികകളും നിയമപുസ്തകങ്ങളും മറ്റ് സാമഗ്രികളും സ്റ്റേഷനുകളില്‍ ലഭ്യമായിരിക്കും. പ്രത്യേകശ്രദ്ധയും പരിചരണവും ആവശ്യമായ കുട്ടികളെയും നിയമപരമായ പ്രശ്നങ്ങളില്‍ അകപ്പെടുകയോ ചെയ്യുന്ന എല്ലാ കുട്ടികളെയും സ്റ്റേഷന്‍ അടിസ്ഥാനത്തില്‍ കണ്ടെത്തുക എന്നതാണ് പദ്ധതിയിലൂടെ ലക്ഷ്യമിടുന്നത്.



ഫ്ലാഷ് ന്യൂസുകൾ ലഭിക്കാൻ കണ്ണൂർ വാർത്തകൾ ആൻഡ്രോയിഡ് ആപ്ലിക്കേഷൻ ഡൗൺലോഡ് ചെയ്യൂ. https://play.google.com/store/apps/details?id=com.kannur.varthakal

No comments

Powered by Blogger.