സമനില പിടിച്ച് ലങ്ക; പരമ്പര നേട്ടത്തോടെ ഇന്ത്യയ്ക്ക് ലോകറെക്കോര്‍ഡ്




ന്യൂഡൽഹി ∙ മൂന്നാം ടെസ്റ്റിലെ സമനില കുരുക്കിനിടയിലും ചരിത്ര നേട്ടത്തോടെ ടീം ഇന്ത്യ. ടെസ്റ്റ് ക്രിക്കറ്റിൽ ഇന്ത്യയ്ക്ക് തുടർച്ചയായ ഒൻപതാം പരമ്പര വിജയം. മൂന്നു ടെസ്റ്റുകളുടെ പരമ്പരയിൽ ശ്രീലങ്കയെ 1–0ത്തിനു തോൽപ്പിച്ചാണ് ഇന്ത്യ അപൂർവ നേട്ടം സ്വന്തമാക്കിയത്. ഒൻപത് ടെസ്റ്റ് പരമ്പരകൾ തുടർച്ചയായി വിജയിക്കുന്ന രണ്ടാമത്തെ ടീമാണ് ഇന്ത്യ. 2015ലെ ശ്രീലങ്കന്‍ പര്യടനം മുതലാണ് ഇന്ത്യ തുടർച്ചയായി ടെസ്റ്റ് പരമ്പരകൾ ജയിച്ചു തുടങ്ങിയത്. 2005–08 കാലഘട്ടത്തിൽ ഓസ്ട്രേലിയ ഒൻപതു പരമ്പരകൾ തുടർച്ചയായി വിജയിച്ചിരുന്നു. ആദ്യ ടെസ്റ്റ് സമനിലയിലായിരുന്നു.

ധനഞ്ജയ ഡി സിൽവയുടെ സെഞ്ചുറി മികവിലാണ് മൂന്നാം ടെസ്റ്റിൽ ലങ്ക, ഇന്ത്യയെ സമനിലയിൽ തളച്ചത്. കളിയവസാനിക്കുമ്പോൾ അഞ്ച് വിക്കറ്റ് നഷ്ടത്തിൽ 299 റൺസ് എന്ന നിലയിലായിരുന്നു ശ്രീലങ്ക. 188 പന്തുകളിലാണ് ധനഞ്ജയ ഡി സിൽവ സെഞ്ചുറി കടന്നത്. 219 പന്തില്‍ 119 റൺ‌സെടുത്തായിരുന്നു ധനഞ്ജയയുടെ മടക്കം. ടെസ്റ്റിലെ തുടക്കക്കാരനായ റോഷൻ സിൽവ അർധ സെഞ്ചുറി നേടി. 154 പന്തിൽ 74 റൺസ് നേടി റോഷൻ പുറത്താകാതെ നിന്നു. ഇന്ത്യയ്ക്കായി രവീന്ദ്ര ജഡേജ മൂന്നും മുഹമ്മദ് ഷമി, ആർ അശ്വിൻ ഒരു വിക്കറ്റും നേടി.
ഇനി അഞ്ച് മത്സരങ്ങളടങ്ങിയ ഏകദിന പരമ്പരയും ടി20 മത്സവും ആണ് ഉളളത്. കോഹ്ലിയ്ക്ക് പകരം രോഹിത്ത് ശര്‍മ്മയാകും ടീം ഇന്ത്യ നയിക്കുക.

No comments

Powered by Blogger.